ໃນໄລຍະນີ້ມີຂ່າວກ່ຽວກັບການລັກຂໍ້ມູນຈາກບັດ ATM ດ້ວຍການລັກຖອນເງິນອອກຈາກບັນຊີຜ່ານຕູ້ ATM ເປັນຈໍານວນຫຼາຍໆລ້ານກີບ ຈົນເຮັດໃຫ້ຜູ້ຕົກເປັນເຫຍື່ອໄດ້ຮັບຜົນເສຍຫາຍຢ່າງຫຼວງຫຼາຍ ລວມເຖິງທະນາຄານທີ່ໃຫ້ບໍລິການເອງ.
ໃນໄລຍະນີ້ມີຂ່າວກ່ຽວກັບການລັກຂໍ້ມູນຈາກບັດ ATM ດ້ວຍການລັກຖອນເງິນອອກຈາກບັນຊີຜ່ານຕູ້ ATM ເປັນຈໍານວນຫຼາຍໆລ້ານກີບ ຈົນເຮັດໃຫ້ຜູ້ຕົກເປັນເຫຍື່ອໄດ້ຮັບຜົນເສຍຫາຍຢ່າງຫຼວງຫຼາຍ ລວມເຖິງທະນາຄານທີ່ໃຫ້ບໍລິການເອງ.
ໃນວັນທີ 10 ມີນາ 2023 ຜູ້ໃຊ້ເຟສບຸກທີ່ຊື່ວ່າ Viyalak Vongprachanh ໄດ້ອອກມາໂພສ ເຖິງເຫດການທີ່ຕົນເອງຕົກເປັນຜູ້ເສຍຫາຍຖືກລັກຖອນເງິນອອກຈາກບັນຊີໂດຍບໍ່ຮູ້ຕົວ ຫຼາຍກວ່າ 57 ລ້ານກີບ.
ຂໍ້ມູນອ້າງອີງຈາກຜູ້ໃຊ້ເຟສບຸກ: Viyalak Vongprachanh
ກ່ອນໜ້າເຫດການດັ່ງກ່າວນັ້ນ ທາງທະນາຄານການຄ້າຕ່າງປະເທດລາວ ກໍ່ໄດ້ອອກແຈ້ງການເຕືອນໄພກ່ຽວກັບກຸ່ມຄົນບໍ່ຫວັງດີພະຍາຍາມລັກລອບເອົາຂໍ້ມູນບັດ ໂດຍຜ່ານຕູ້ ATM ແລະ ໄດ້ຮຽກຮ້ອງໃຫ້ລູກຄ້າຂອງທະນາຄານມີຄວາມລະມັດລະວັງໃນການນຳໃຊ້ຕູ້ ATM ຫຼາຍຂຶ້ນ ພ້ອມທັງເປັນຫູເປັນຕານໍາກັນໃນການແຈ້ງຄວາມຜິດປົກກະຕິທີ່ເກີດຂຶ້ນກັບຕູ້ ATM ຜ່ານທາງສາຍດ່ວນ 1555 ຕະຫຼອດ 24 ຊົ່ວໂມງ.
ຂໍ້ມູນອ້າງອີງຈາກເຟສບຸກເພຈ: BCEL Bank
ເມືອມີເຫດການແບບນີ້ແລ້ວ ເຮົາມາຮູ້ຈັກກັບ “ATM Skimming” ແລະ ວິທີປ້ອງກັນຕົນເອງຈາກການລັກຂໍ້ມູນບັດໃນລັກສະນະນີ້ໄດ້ແນວໃດ. ໃນບົດຄວາມນີ້ຈະໄດ້ອະທິບາຍກ່ຽວກັບໄພຄຸກຄາມດັ່ງກ່າວ ເພື່ອໃຫ້ເປັນຄວາມຮູ້ ແລະ ເປັນແນວທາງໃນການປ້ອງກັນຕົນເອງບໍ່ໃຫ້ຕົກເປັນເຫຍື່ອຂອງ “ATM Skimming”.
ATM Skimming ຄືຮູບແບບການດັກຂໍ້ມູນ ແລະ ດັກລະຫັດບັດ ໂດຍໃຊ້ວິທີການເຮັດປຸ່ມກົດປອມ ແລະ ເຄື່ອງອ່ານບັດປອມຕິດທັບກັບອຸປະກອນຂອງແທ້ເທິງເຄື່ອງ ເຄື່ອງອ່ານບັດປອມນີ້ຈະອ່ານຂໍ້ມູນຈາກແຖບແມ່ເຫຼັກເທິງບັດແລ້ວຄັດລອກລົງໃນໜ່ວຍຄວາມຈຳ ຊຶ່ງອຸປະກອນນີ້ຖືກດັດແປງໃຫ້ມີຂະໜາດນ້ອຍ ແລະ ໃກ້ຄຽງກັບເຄື່ອງອ່ານບັດຕົວຈິງ.
ຫຼັງຈາກທີ່ອ່ານຂໍ້ມູນໃນບັດຊຶ່ງເປັນຂໍ້ມູນເລກປະຈຳຕົວຂອງບັດໄດ້ແລ້ວ ກໍ່ຈະນຳມາເຮັດບັດ ATM ປອມ ຂັ້ນຕອນຕໍ່ໄປກໍ່ຈະເປັນການລັກລະຫັດຜ່ານ ໂດຍການໃຊ້ກ້ອງຮູເຂັມເພື່ອລັກເບິ່ງລະຫັດຜ່ານ ຊຶ່ງຈະຕິດຕັ້ງໄວ້ບໍລິເວນໃກ້ໆ ແປ້ນໃສ່ລະຫັດ ເພື່ອເບິ່ງວ່າເລກລະຫັດ 6 ຕົວ ແມ່ນຫຍັງ. ວິທີນີ້ອາດຈະບໍ່ປະສົບຜົນສຳເລັດເນື່ອງຈາກຄົນກົດອາດຈະເອົາມືບັງ ຫຼື ມີແສງສະທ້ອນກໍ່ຈະເຮັດໃຫ້ພາບທີ່ໄດ້ບໍ່ຊັດເຈນ.
ດັ່ງນັ້ນ, ຈຶ່ງມີການດັດແປງ ຫຼື ພັດທະນາຂຶ້ນມາອີກ ດ້ວຍວິທີການດັກຂໍ້ມູນການກົດລະຫັດ ຫຼື ທີ່ເອີ້ນວ່າ Key logger ຊຶ່ງຈະຈື່ການກົດແປ້ນພິມ ແລະ ບັນທຶກໄວ້ ໂດຍຜູ້ບໍ່ຫວັງດີຈະນຳເອົາຊ໋ອບແວຕໍ່ເຂົ້າກັບແປ້ນຄີບອດປອມ ແລ້ວນຳມາປິດທັບຂອງແທ້ ວິທີນີ້ຈະມີຄວາມແມ່ນຢຳກວ່າການຕິດກ້ອງຮູເຂັມ (ສາມາດເບິ່ງຕົວຢ່າງ ແລະ ວິທີການປ້ອງກັນໄດ້ຈາກການແຈ້ງການເຕືອນໄພ ຂອງທະນາຄານການຄ້າຕ່າງປະເທດລາວ ຈາກຮູບຂ້າງເທິງ). ເມື່ອຜູ້ບໍ່ຫວັງດີໄດ້ທັງບັດປອມ ແລະ ລະຫັດຜ່ານ ກໍ່ຈະນຳໄປກົດເງິນອອກຈາກບັນຊີໄດ້ຢ່າງສະດວກສະບາຍ.
ທ່ານສາມາດອ່ານວິທີການປ້ອງກັນໄພຄຸກຄາມຂອງ ATM Skimming, ການນຳໃຊ້ລະບົບ Payment, E-Money ແລະ E-Banking ໃຫ້ມີຄວາມປອດໄພ ແລະ ການນຳໃຊ້ແອັບພິເຄຊັ່ນທະນາຄານຜ່ານທາງອອນລາຍ ໃຫ້ປອດໄພຈາກການຖືກແຮັກ (Hack) ລັກເງິນ ທີ່ເວັບໄຊ ລາວເຊີດ.
ເອກະສານອ້າງອີງ:
- https://www.facebook.com/viyalak.vongphachanh?eav=Afb83rWwWa1gBH_0J1G_xSZbiPA2vrLJ3WYgSyw7OCd6WNbI7kYcsYDCkahii8S8N3Q&paipv=0
- https://www.facebook.com/BCEL.Bank
- https://www.checkraka.com/money/article/111303