ໃນຕອນບ່າຍຂອງວັນທີ 13 ມີນາ 2024 ນີ້, ທີ່ ຫ້ອງປະຊຸມໃຫຍ່ ຂອງ ກະຊວງເຕັກໂນໂລຊີ ແລະ ການສື່ສານ (ເຂດສີສະເກດ), ໜ່ວຍຊາວໜຸ່ມກົມຄວາມປອດໄພໄຊເບີ (ກຄຊ), ກະຊວງເຕັກໂນໂລຊີ ແລະ ການສື່ສານ ໄດ້ດຳເນີນການໄຂກອງປະຊຸມໃຫຍ່ ຄັ້ງທີ II ຂອງຕົນຂຶ້ນ, ຊຶ່ງໃຫ້ກຽດເຂົ້າຮ່ວມເປັນຄະນະປະທານຂອງ ສະຫາຍ ຄໍາຫຼ້າ ສູນນະລັດ ຄະນະພັກກະຊວງ, ເລຂາໜ່ວຍພັກ ກົມຄວາມປອດໄພໄຊເບີ, ສະຫາຍ ພວງປະເສີດ ແກ້ວສຸວັນ ຄະນະພັກກະຊວງ, ກໍາມະການຄະນະບໍລິຫານງານ ສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານ ຊາວໜຸ່ມປະຊາຊົນ ປະຕິວັດລາວ ກະຊວງເຕັກໂນໂລຊີ ແລະ ການສື່ສານ (ຄຊປປລ ກຕສ), ມີເລຂາໜ່ວຍຊາວໜຸ່ມ, ຕາງໜ້າປະທານຮາກຖານກໍາມະບານ ແລະ ຫົວໜ້າໜ່ວຍສະຫະພັນແມ່ຍິງ, ມີບັນດາຮາກຖານ/ໜ່ວຍຊາວໜຸ່ມ ບັນດາກົມ/ທຽບເທົ່າ ແລະ ພ້ອມດ້ວຍບັນດາສະມາຊິກຊາວໜຸ່ມພາຍໃນກົມຄວາມປອດໄພໄຊເບີ ເຂົ້າຮ່ວມ ທັງໝົດ 45 ສະຫາຍ, ຍິງ 10 ສະຫາຍ.
ໃນກອງປະຊຸມໃຫຍ່ຄັ້ງນີ້ ໄດ້ຮັບຟັງບົດລາຍງານການເມືອງ ແລະ ບົດສຳຫຼວດການນຳພາ, ສະຫຼຸບຕີລາຄາຜົນງານການເຄື່ອນໄຫວວຽກງານຂອງໜ່ວຍຊາວໜຸ່ມ ກຄຊ ໃນໄລຍະຜ່ານມາ (2019-2023) ແລະ ກໍານົດທິດທາງແຜນການໃນ 05 ປີຕໍ່ໜ້າ (2024-2028) ຊຶ່ງໄດ້ວາງມາດຕະການໃນການຈັດຕັ້ງປະຕິບັດໄວ້ຄື: ເພີ່ມທະວີການເປັນເຈົ້າການ ໃນການນໍາພາ-ຊີ້ນໍາ ສຶກສາອົບຮົມວຽກງານການເມືອງ-ແນວຄິດ ດ້ວຍຫຼາຍຮູບແບບ, ຫຼາຍວິທີການ ເພື່ອໃຫ້ແທດເໝາະກັບສະພາບການ, ເອົາໃຈໃສ່ ແລະ ໃຫ້ຄວາມສໍາຄັນກັບວຽກງານຍົກລະດັບວິຊາສະເພາະ ເປັນຕົ້ນແມ່ນ: ວຽກງານດ້ານຄວາມປອດໄພ ແລະ ສື່ສັງຄົມອອນລາຍ. ເອົາໃຈໃສ່ຄົ້ນຄວ້າ, ພັດທະນາສົ່ງເສີມການນໍາໃຊ້ ແລະ ໂຄສະນາເຜີຍແຜ່ຂໍ້ມູນຂ່າວສານຄວາມປອດໄພ, ໃຫ້ແທດເໝາະກັບເງື່ອນໄຂການພັດທະນາເຕັກໂນໂລຊີ ເຂົ້າໃນການພັດທະນາເສດຖະກິດ-ສັງຄົມ ຕາມທິດຫັນເປັນອຸດສາຫະກໍາ ແລະ ທັນສະໄໝ ພ້ອມທັງຜັນຂະຫຍາຍຍຸດທະສາດ ແລະ ແຜນພັດທະນາເສດຖະກິດດິຈິຕອນແຫ່ງຊາດ ໃຫ້ປາກົດຜົນເປັນຈິງເທື່ອລະກ້າວ, ສຸມໃສ່ຈັດຕັ້ງປະຕິບັດຂໍ້ແຂ່ງຂັນ 4 ບຸກ ໃຫ້ຕິດພັນໄປກັບແຜນການເຄື່ອນໄຫວວຽກງານວິຊາສະເພາະຂອງໜ່ວຍ ເພື່ອຮັບປະກັນໄດ້ ປະສິດທິພາບ ແລະ ປະສິດທິຜົນສູງສຸດ. ໃນໂອກາດນີ້, ເພື່ອເປັນການຊົມເຊີຍຕໍ່ກັບຜົນງານໃນການປະຕິບັດໜ້າທີ່ໃນໄລຍະຜ່ານມາ ຍັງໄດ້ມີພິທີມອບ-ຮັບໃບຍ້ອງຍໍ ຂັ້ນຄະນະບໍລິຫານງານຊາວໜຸ່ມ ປປລ ກຕສ ໃຫ້ແກ່ຄະນະໜ່ວຍຊາວໜຸ່ມ ກຄຊ ຊຸດເກົ່າ.
ພ້ອມດຽວກັນນີ້, ບັນດາຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະໜ່ວຍຊາວໜຸ່ມ ກຄຊ ຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກໍານົດໄວ້ ຊຶ່ງມີຜູ້ລົງຮັບສະໝັກເລືອກຕັ້ງທັງໝົດ 05 ສະຫາຍ, ຍິງ 01 ສະຫາຍ ແລະ ເລືອກໄດ້ 03 ສະຫາຍ. ກອງປະຊຸມຄັ້ງປະຖົມມະລຶກຄົບຄະນະປະທານກອງປະຊຸມໃຫຍ່ ໄດ້ຕົກລົງເຫັນດີເລືອກເອົາ ຄະນະໜ່ວຍຊາວໜຸ່ມ ຄື: ສະຫາຍ ບຸນມີ ນັນທະປັນຍາ ເປັນເລຂາ, ສະຫາຍ ກັອກກີ ແກ້ວສິນຖາວອນ ເປັນຮອງເລຂາ ແລະ ສະຫາຍ ນາງ ຄອນສະຫວັນ ສຸວັນນະຈັກ ເປັນກຳມະບານ ທັງເປັນປະທານກວດກາ.
