Dell ປະກາດເຕືອນເຫດຂໍ້ມູນລູກຄ້າຈາກ Dell Portal ຣົ່ວໄຫຼ ໂດຍແຮັກເກີ ຜູ້ທຳການໂຈມຕີ ອ້າງວ່າ ໄດ້ລັກຂໍ້ມູນ ຂອງລູກຄ້າ ທີ່ກ່ຽວຂ້ອງກັບການຊື້ສິນຄ້າຈາກ Dell ໄປເຖິງ 49 ລ້ານລາຍ.
Dell ເລີ່ມສົ່ງອີເມວເຕືອນລູກຄ້າເຖິງເຫດຂໍ້ມູນຣົ່ວໄຫລນີ້ ໃນວັນທີ 8 ພຶດສະພາ ທີ່ຜ່ານມາ ໂດຍກ່າວວ່າ ກຳລັງສືບສວນເຫດການເຈາະຂໍ້ມູນດັ່ງກ່າວ ຈາກ Dell Portal ຊຶ່ງໃນເບື້ອງຕົ້ນ ຂໍ້ມູນທີ່ຫຼຸດອອກໄປນັ້ນ ລວມມີ ຊື່, ທີ່ຢູ່ ແລະ ຂໍ້ມູນຜະລິດຕະພັນ ທີ່ລູກຄ້າໄດ້ຊື້ໄປຈາກ Dell ໄດ້ຄື: ຮຸ່ນ, Service Tag, ຄຳອະທິບາຍຕົວເຄື່ອງ, ວັນທີ ໃນການຊື້, ແລະ ຂໍ້ມູນໃນການຮັບປະກັນ.
ໂດຍທາງບໍລິສັດ ໄດ້ເນັ້ນວ່າ ຂໍ້ມູນທີ່ຣົ່ວອອກໄປດັ່ງກ່າວນັ້ນ ບໍ່ມີຂໍ້ມູນທາງການເງີນ, ຂໍ້ມູນກ່ຽວກັບການຊຳລະເງີນ ຫລື ເບີໂທລະສັບ ຂອງລູກຄ້າ ແຕ່ຢ່າງໃດ ແລະ ໄດ້ເຮັດວຽກຮ່ວມກັບຫນ່ວຍງານບັງຄັບໃຊ້ກົດຫມາຍ ລວມໄປເຖິງຄະນະສືບສວນຈາກພາຍນອກ ເພື່ອກວດສອບເຫດນີ້ໂດຍລະອຽດ.
ທາງດ້ານ Dark Web ໄດ້ມີຜູ້ໃຊ້ນາມ Menelik ນຳຂໍ້ມູນທີ່ກ່າວອ້າງວ່າ ລັກມາຈາກ Dell ມາວາງຂາຍໃນວັນທີ 28 ເມສາ ໂດຍ Menelik ກ່າວວ່າ ເປັນຂໍ້ມູນຂອງລູກຄ້າ ແລະ ຜະລິດຕະພັນຕ່າງໆ ທີ່ຊື້ຈາກ Dell ຕັ້ງແຕ່ປີ 2017 ເຖິງ 2024 ຊຶ່ງມີທັງລູກຄ້າ ບຸກຄົນ ແລະ ອົງກອນ ແລະ ອື່ນໆ ແລະ ແມ່ນຈະບໍ່ໄດ້ມີການຢືນຢັນຢ່າງເປັນທາງການວ່າ ເປັນເຫດຂໍ້ມູນຣົ່ວໄຫລດຽວກັບທີ່ Dell ກ່າວເຖິງໃນອີເມວແຈ້ງເຕືອນ ລາຍລະອຽດຂອງຂໍ້ມູນທີ່ Menelik ມີນັ້ນ ກໍກົງຕາມທີ່ Dell ໄດ້ປະກາດອອກມາ.
ທີ່ມາ : https://www.bleepingcomputer.com/